lacrymasque ejus suis crinibus detergens, facturum spopondit : et prævertit statim lumen nascentis diei.
Jugum sororium consponsæ factionis, ne parentibus quidem visis, rectà de navibus scopulum petunt illum, præcipiti cum velocitate : nec venti ferentis oppertæ præsentiam, licentiosa cum temeritate prosiliunt in altum. Nec immemor Zephyrus regalis edicti, quamvis invitus, susceptas eas gremio spirantis auræ, solo reddidit. At illæ incontatæ, statim conferto vestigio domum penetrant, complexæque suam prædam, sorores nomine mentientes, thesaurumque penitus abditæ fraudis vultu læto tegentes, sic adulant : Psyche, non ità ut pridem parvula, et ipsa jam mater es. Quantùm putas boni nobis geris in ista perula ? quantis gaudiis totam domum nostram hilarabis ? O nos beatas, quas infantis aurei nutrimenta lætabunt ! qui si parentum, ut oportet, pulchritudini responderit, prorsus Cupido nascetur. Sic affectione simulatâ, paulatim sororis invadunt animum.
