L. APULEII,
MADAURENSIS PLATONICI,
METAMORPHOSEOS :
SIVE
LUSUS ASINI.
LIBER QUINTUS.
Psyche teneris et herbosis locis in ipso toro roscidi graminis, suave recubans, tanta mentis perturbatione sedata dulce conquievit, jamque sufficienti recreata somno, placidiore resurgit animo. Videt lucum proceris et vastis arboribus consitum : videt fontem vitreo latice perlucidum, medio luci meditullio. Propè fontis adlapsum domus regia est, ædificata non humanis manibus, sed divinis artibus. Jàm scires ab introitu primo, Dei cujuspiam luculentum et amœnum videre te diversorium. Nam summa laquearia citro et ebore curiosè cavata, subeunt aureæ columnæ, parietes omnes argenteo celamine conteguntur, bestiis et id genus pecudibus occurentibus ob os introeuntium. Mirus prorsùm (magnæ
