teris anxiatum iri prædicant. Sed ego te narrationibus lepidis, anilibusque fabulis protinus avocabo.
Et incipit : erant in quadam civitate Rex et Regina, hi tres numero filias, forma conspicuas, habuere, sed majores quidem natu, quamvis gratissimâ specie, idoneè tamen celebrari posse laudibus humanis credebantur ; at verò puellæ junioris, tàm præcipua, tàm præclara pulcritudo, nec exprimi, ac ne sufficienter quidem laudari sermonis humani penuria poterat. Multi denique civium, et advenæ copiosi, quos eximii spectaculi rumor studiosa celebritate congregabat, inaccessæ formositatis admiratione stupidi, et admoventes oribus suis dexteram, primore digito in erectum pollicem residente, ut ipsam prorsùs deam Venerem, religiosis adorationibus venerabantur.
Jàmque proximas civitates, et attiguas regiones fama pervaserat, Deam, quam cærulum profundum pelagi peperit, et ros spumantium fluctuum educavit, jàm nu-
