quibusdam Marti deo blanditi, paululùm conquiescunt. Etenim nobis anus illa recens ordeum affatim, et sine ullâ mensura largita est : ut equus quidem meus tanta copia, et quidem solus potitus, Saliares se cænasse cænas crederet. Ego verò quamquam aliàs ordeum tunsum minutatim, et diutina refectione jurulentum semper ederim ; rimatus angulum, quo panis reliquiæ totius multitudinis congestæ fuerant, fauces diutina fame saucias et araneantes vehementer exerceo.
Et ecce nocte promota, latrones expergiti castra commovent : instructique variè, partim gladiis armati, et in lemures reformati, concito se gradu proripiunt. Nec me tamen instanter ac fortiter manducantem, vel somnus imminens impedire potuit. Et quamquam priùs, cùm essem Lucius, unico vel secundo pane contentus mensa decederem, tunc ventri tàm profundo serviens, jàm fermè tertium qualum rumigabam. Huic me operi attentum clara lux oppressit. Tandem denique asinali verecundia ductus, ægerrimè tamen digrediens, rivulo proximo sitim lenio.
