bestiæ magnitudinem, suique contubernalis opportunâ liberalitate lætatus, jubet nobis protinus gaudii sui gerulis, decem aureos, ut ipse habebat, è suis loculis adnumerari.
Tunc, ut novitas consuevit ad repentinas visiones animos hominum pellere, multi numero mirabundi ad bestiam confluebant, quorum satis callenter curiosos aspectus Thrasyleon noster impetu minaci frequenter inhibebat. Consonâque civium voce satis felix ac beatus Demochares ille sæpè celebratus, quòd post tantam cladem ferarum, novo proventu quoquomodò fortunæ resisteret. Jubet novalibus suis confestim bestiam ire : jubet summa cum diligentia reportari. Sed suscipiens ego, caveas, inquam, domine, flagrantia solis et itineris spatio fatigatam, cœtui multarum, et, ut audio, non rectè valentium committere ferarum. Quin potiùs domûs tuæ patulum ac perflatilem locum, immò et lacu aliquo conterminum refrigerantemque prospicis ? An ignoras hoc genus bestiæ lucos consitos, et specus roridos, et colles frigidos, et fontes amœnos semper incubare ?
