multijugi verbis idoneis possit explicare ? gladiatores isti famosæ manûs, venatores illi probatæ pernicitatis ; alibi noxii, perditâ securitate, suis epulis bestiarum saginas instruentes. Confixilis machinæ sublicæ, turres tabularum nexibus, ad instar circumforaneæ domûs, floridæ picturæ, decora futuræ venationis receptacula. Qui præterea numerus, quæ facies ferarum ? nàm præcipuo studio forensi etiam advexerat generosa illa damnatorum capitum funera.
Sed præter cæteram speciosi muneris supellectilem, totis utcumque patrimonii viribus immanis ursæ comparabat numerum copiosum. Nàm præter domesticis venationibus captas, præter largis emitionibus partas, amicorum etiam donationibus variis certatim oblatas, tutela sumptuosa sollicitè nutriebat. Nec ille tàm clarus, tàmque splendidus publicæ voluptatis apparatus, invidiæ noxios effugit oculos. Nàm diutina captivitate fatigatæ simul, et æstiva flagrantia maceratæ, pigra etiam sessione
