jam cætera semiferis Lapithis Thebanis, Centaurisque similia.
Tunc inter eos unus, qui robore cæteros antistabat, nos quidem, inquit, Milonis Hypatini domum fortiter expugnavimus. Præter tantam fortunæ copiam, quàm nostrâ virtute nacti sumus, et incolumi numero castra nostra petivimus ; et, si quid ad rem, octo pedibus auctiores remeavimus. At vos qui Bœotias urbes appetistis, ipso duce vestro fortissimo Lamacho diminuti, debilem numerum reduxistis, cujus salutem merito sarcinis istis, quas advexistis, omnibus certè antetulerim. Sed illum quidem virum nimia virtus sua peremit ; inter inclytos reges ac duces præliorum tanti viri memoria celebrabitur. Enim vos bonæ frugi latrones inter furta parva atque servilia, timidule per balneas et aniles cellulas reptantes, scrutariam facitis.
Suscipit unus ex illo posteriore numero :
