sævienti ventri tuo soles aviditer ingurgitare.
Tremens ad hæc et stridenti vocula pavida sic anus : At vobis, fortissimi fidelissimeque mei hospitatores juvenes, affatim cuncta suavi sapore percocta pulmenta præsto sunt : panis numerosus, vinum probè calicibus effricatis affluenter immissum, et, ex more, calida tumultuario lavacro vestro præparata. In fine sermonis hujus, statim sese devestiunt : nudatique, et flammæ largissimæ vapore recreati, calidaque perfusi, et oleo peruncti, mensas dapibus largiter instructas accumbunt.
Commodùm cubuerant : et ecce quidam longè plures numero juvenes adveniunt alii, quos incontanter adæque latrones arbitrarere. Nam et ipsi prædas aureorum argenteorumque nummorum, ac vasculorum, vestisque sericæ et intextæ filis aureis invehebant. Hi simili lavacro refoti, inter foros sociorum sese reponunt : nunc sorte ducti, ministerium faciunt. Estur ac potatur, pulmentis acervatim, panibus aggeratim, poculis agminatim ingestis. Clamore ludunt, strepitu cantillant, conviciis jocantur : ac
