percussis januis, trepido etiam rumore viciniæ conclamantis latrones, fugit territus.
Nec mora, cum vi patefactis ædibus, globus latronum invadit omnia, et singula domus membra cingit armata factio : et auxiliis hinc inde convolantibus, obsistit discursus hostilis. Cuncti gladiis et facibus instructi noctem illuminant, coruscat in modum ortivi solis, ignis et mucro. Tunc horreum quoddam satis validis claustris obseptum obseratumque, quod mediis ædibus constitutum gazis Milonis fuerat refertum, securibus validis aggressi diffindunt. Quo passim recluso totas opes vehunt : raptimque constrictis sarcinis singuli partiuntur. Sed gestaminum modus numerum gerulorum excedit. Tunc opulentiæ nimiæ nimio ad extremas metas deducti, nos duos asinos, et equum meum, productos è stabulo, quantùm possunt gravioribus sarcinis onerant, et domo jàm vacua minantes baculis exigunt : unoque de sociis ad speculandum, qui de facinoris inquisitione nuntiaret, relicto, nos crebro tundentes per avia montium ducunt concitos.
Jàmque rerum tantarum pondere, et
