L. APULEII,
MADAURENSIS PLATONICI,
METAMORPHOSEOS :
SIVE
LUSUS ASINI.
LIBER TERTIUS.
Commodum punicanibus phaleris Aurora roseum quatiens lacertum, cœlum inequitabat : et me securæ quieti revulsum, nox diei reddidit. Æstus invadit animum vespertini recordatione facinoris. Complicitis denique pedibus, ac palmulis in alternas digitorum vicissitudines super genua connexis, sic grabatum cossim insidens, ubertim flebam : jàm forum et judicia, jàm sententiam, ipsum denique carnificem imaginabundus. An mihi quisquam tàm mitis, tàmque benivolus judex obtinget, qui me ternæ cædis perlitum cruore et tot civium sanguine delibutum, innocentem pronuntiare poterit ? Hanc illam mihi gloriosam peregrinationem fore Chaldæus Diophanes obstinate prædicabat. Hæc idemtidem mecum replicans, fortunas meas ejulabam.
