Ecce uxor misella flens, cum hesternis testibus introrupit anxia ; et, statim corpori superruens, multumque ac diu deosculata, sub arbitrio luminis recognoscit omnia. Et conversa, Philodelpotum requirit actorem : et ei præcipit bono custodi redderet sine mora præmium. Et oblato statim, summas, inquit, tibi juvenis gratias agimus : et hercules ob sedulum istud ministerium, inter cæteros familiares dehinc numerabimus. Ad hæc ego insperato lucro diffusus in gaudium, et in aureos refulgentes, quos idemtidem manu meâ ventilabam, attonitus : Immò, inquam, domina, de famulis tuis unum putato ; et quotiens operam nostram desiderabis, fidenter impera.
Vix effatum me statim familiares omnes nefarium exsecrati, raptis cujusquemodi telis, insequuntur. Pugnis ille malas offendere, scapulas alius cubitis impengere, palmis infestis hic latera suffodere ; calcibus insultare, capillos distrahere, vestem discindere. Sic in modum superbi juvenis Adonei, vel mustelatis peplis laceratus atque discerptus, domo proturbor.
