nasus integer, incolumes oculi, salvæ aures, illibata labia, mentum solidum. Vos in hanc rem, boni quirites, testimonium perhibetote. Et cum dicto, consignatis illis tabulis, facessit. At ego, jube, inquam, domina cuncta quæ sunt usui necessaria, nobis exhiberi. At quæ, inquit, ista sunt ? Lucerna, aio, prægrandis, et oleum ad lucem luci sufficiens, et calida cum œnophoris et calice, cænarumque reliquiis discus ornatus.
Tunc illa capite quassata : Abi, inquit, fatue, qui in domo funestâ cænas et partes requiris ; in quâ totiugis jam diebus ne fumus quidem visus est ullus. An istic comessatum te venisse credis ? Quin sumis potiùs loco congruentes luctus et lacrymas ? Hæc simul dicens, respexit ancillulam : et, Myrrhine, inquit, lucernam et oleum trade confestim. Et incluso custode cubiculo protinùs facessit.
Sic desolatus ad cadaveris solatium,
