nentur tibi. Sed heus invenis, cave diligenter ut primatis civitatis hujus filii cadaver à malis Harpyiis probe custodias. Ineptias, inquam, mihi narras, et nugas meras. Vides hominem ferreum, et insomnem, certè perspicaciorem ipso Lynceo, vel Argo, et oculeum totum.
Vix finieram : et illicò me perduxit ad domum quampiam, cujus ipsis foribus obseptis, per quamdam brevem posticulam introvocat me, et conclave quoddam obseratis luminibus umbrosum, demonstrat matronam flebilem, fuscâ veste contectam, quam propter adsistens, hic inquit, auctoratus ad custodiam mariti tui fidenter accessit. At illa, crinibus antependulis hinc indè dimotis, etiam in mærore luculentam proferens faciem, meque respiciens : Vide, oro, inquit, quam expergitè munus obeas. Sine cura sis, inquam ; modò corollarium idoneum compara. Quo placito, ocyter surrexit, et ad aliud me cubiculum inducit. Ibi corpus splendentibus linteis coopertum, introductis quibusdam septem testibus, manu revelat ; et diutine visu perfleto, obtestata fidem præsentium, singula demonstrat anxie, membra contacta de industria quodam tabulis prænotante. Ecce, inquit,
