ingratis cogebat effari, perfecit ut vellet. Ac sic aggeratis in tumulum stragulis, et effultus in cubitum, suberectusque in torum porrigit dexteram, et ad instar oratorum conformat articulum ; duobusque infimis conclusis digitis, ceteros eminentes porrigit, et infesto pollicè clementer subrigens, infit Thelephron.
Pupillus ego Mileto profectus ad spectaculum Olympicum, cùm hæc etiam loca provinciæ famigerabilis adire cuperem, peragrata cuncta Thessalia, fuscis avibus Larissam accessi. Ac dùm singula pererrans, tenuato admodùm viatico, paupertati meæ fomenta conquiro ; conspicor medio foro procerum quemdam senem, insistebat lapidem, claraque voce prædicabat, si qui mortuum servare vellet, de pretio liceretur. Et ad quempiam prætereuntium, quid hoc, inquam, comperior ? hiccine mortui solent aufugere ? Tace, respondit ille. Nam oppido puer, et satis peregrinus es, meritòque ignoras Thessaliæ te consistere, ubi sagæ mulieres ora mortuorum passim demorsicant, eaque sunt illis artis magicæ supplementa. Contrà ego, et quæ tu, inquam, dic sodes,
