mea, jàm domina cubitum reddita, jacta proximat rosa serta, et rosa soluta in sinu tuberante. Ac me pressim deosculato, et corollis revincto, ac flore persperso, arripit poculum, ac desuper aqua calida injecta, porrigit bibam, idque modicùm. Priùs quàm totum exsorberem, clementer invadit : ac relictum paululatim labellis minuens, meque respiciens, sorbillat dulciter : sequens et tertium inter nos vicissim et frequens alternat poculum.
Cùm ego jàm vino madens, nec animo tantùm verùm etiam corpore ipso ad libidinem inquies alioquin et petulans, etiam saucius paulisper inguinum fine, lacinia remota, impatientiam veneris Fotidi meæ monstrans : Miserere, inquam, et subveni maturius. Nàm, ut vides, prælio, quod nobis sine fecialis officio indixeras, jàm proximante vehementer intentus, ubi primam sagittam sævi Cupidinis in ima præcordia mea delapsam excepi, arcum meum et ipse vigor attendit, et oppido formido ne nervus rigoris nimietate rumpatur. Sed, ut mihi morem plenius gesseris, ineffusum laxa crinem, et capillo fluente undante, ede complexus amabiles.
Nec mora, cùm cibariis omnibus illis
