proles : sed et cætera corporis inexplicabiliter ad regulam congruentia, inenormis proceritas, succulenta gracilitas, rubor temperatus, flavum et inaffectatum capillitium : oculi cæsii quidem, sed vigiles, et in aspectu micantes prorsus aquilino, quoquò versum floridi : speciosus et immeditatus incessus. Et adjecit : Ego te, ô Luci, meis istis manibus educavi : quidni ? parentis tuæ non modò sanguinis verùm alimoniarum etiam socia fui. Nam ex familia Plutarchi ambæ prognatæ sumus, et eandem nutricem simul bibimus, et in nexu germanitatis unà coaluimus, nec aliud nos quàm dignitas discernit : quòd clarissimas illa, ego privatas nuptias fecimus. Ego sum Byrrhena illa, cujus fortè sæpiculè nomen inter tuos frequentatum educatores retines. Accede itaque hospitium fiducia, immò verò jam tuum proprium larem.
Adhæc ego, jam sermonis ipsius mora rubore digesto, absit, inquam, parens, ut
