foncieres, ordinaires : mais nõ les cõſtituees pẽdant le mariage : celles d’auparauant diminuans autant le doüaire.
L’heritier du mary doit releuer l’heritage ſur lequel la femme prent doüaire.
Doüaires ont taiſible hypothecque & n’antiſſement.
La vefue peut contraindre l’heritier luy bailler ſon doüaire à part, & l’heritier elle de le prendre.
La douairiere lottit, & l’heritier choiſit.
Doüaire propre aux enfans eſt vne legitime couſtumiere priſe ſur les biens de leur pere par le moyen & benefice de leur mere.
Lequel accroiſt aux enfans du mariage quant l’vn d’eux decede du viuant du pere. Mais s’il decedoit apres la mort du pere, tous ſes enfans y ſuccederoient, ores qu’ils ou aucuns d’eux fuſſent d’vn autre lict.
Que ſi tous les enfans decedent auant le pere, leur droict de doüaire eſt eſteint.
Pendant les vies du pere & des enfans, nul d’eux ne le peut aliener ny hypothecquer au preiudice les vns des autres.
En doüaire n’y a droict d’aineſſe.
Tout ce qui ſe compte en legitime, ſe compte en doüaire.
On ne peut eſtre heritier & doüairier.
