Et l’andemain, quant il fut ajornez,
Li rois de France ne s’est aseürez :
Droit vers Paris fut ses chamins tornez,
O lui si home de cui il fut amez.
Gerins li rois vers Coloigne est alez ;
Siens iert li regnes, sire en estoit clamez.
D’autre part s’est Hernaus achaminez
Vers Gironvile dont il estoit chasez ;
O lui s’an est li rois Girbers alez,
Et li anfant qui mout orent biautez,
Et Berneysonz et Hymberz li barbez,[1]
Et Doz li Gris li cuvers parjurez.
De lor jornées ne me sus amanbrez,
Mais tant esrerent, les frains abandonnez,
De Gironvile voient les fermetez.
An la vile antrent li baron naturez,
Vers le palais se sont achaminez,
Dame Ludie troverent au degrez ;[2]
Grant joie mainne, ses a tous acolez,
Quant elle sot qu’il ierent acordez,
Car Berniers iert de son lignage nez,
Et Doz li Gris et Ymberz li barbez.
A icest mot sont el palais montez.
. . . . . . . . . . . . . . . . . . . . .
Page:Anonyme - Raoul de Cambrai.djvu/431
Cette page a été validée par deux contributeurs.
320
raoul de cambrai
![](http://upload.wikimedia.org/wikipedia/commons/thumb/3/3a/Anonyme_-_Raoul_de_Cambrai.djvu/page431-1024px-Anonyme_-_Raoul_de_Cambrai.djvu.jpg)