Puis ait s’enseigne hautement escrié.
Quant li anfant ont la vois escouté,
Cele part vienent sor les destriers armé :
La ot estor et fier chaple mené,
Mais li anfant ont Girbert remonté.
Bien se defant Berniers au branc letré :
Qui qu’il ataint tot a son tans finé ;
Hymbers ses peres i a maint cop donné,
Mais lor deffandres ne valt .j. oef pellé :
Tout .iij. fuissient ocis et desmanbré,
Ne fust li rois de France lo raigné,
Qui la sorvint par fine verité.
Li troi baron li ont lor brans donné,
Et lor autre home sont an fue torné :
Li Loheranc an ont mout decopé.
.IIII. grans liues ait li anchaus duré,
Li Loheranc sont arriers retorné.
La bataille ont li Loheranc vaincue.
Li rois de France n’i a fait atendue,
Girbert apelle cui proesce salue,
Et puis Gerin a la chiere manbrue :
« Signor, fait il, por la Virge absolue
« Mors est Raoulz, sachiez formant m’annue.
« Berniers li a l’arme dou cors tolue ;
« Nos l’avons pris ; mais c’iert descovenue
« Se l’ocions, puis que l’avons en mue.
« Je ferai pais, se il ne vos anue ;
« A roi Girbert, cui proesce salue,
« Devanront home sans point de retenue. »
Girbers l’entent, duremant li annue ;
Mais, por l’amor le roi qui l’en argue,
La pais creante sans l’acorde volue.[1]
A icest mot n’i ot plus d’atandue :
Feautez ait des barons receüe.
Sil li jurerent, mais mal li i ont tenue,
Si com orrez se il ne vos anue.
- ↑ 756 sans, leçon douteuse, la dernière lettre est effacée.
