Par la bataille vont Loheranc poignant ;
Li rois Girbers tint l’espée tranchant,
Et Mauvoisins qui mout l’amoit formant.
De lor ami sont duremant dolant.
A tant ez vos l’ampereor poissant,
Raoul ancontre que l’en aloit portant,
De duel et d’ire vait formant sospirant,
Puis s’escria a sa vois hautemant :
« Poigniez après, franc chevalier vaillant !
« Se mon nevou Raoul, c’amoie tant,
« N’est hui vangiez, par Deu le roiamant,
« N’avrai mais joie en trestot mon vivant. »
A tant s’en vont vers le tornoi poignant ;
La conmensa .j. estor moult pesant.
Quant l’ampereres fut venus en l’estor,
Granz fu li criz environ et entor.
Li rois de France, qui mout ot grant tristor,
Des esperons broche le misoldor ;
Guillaume ancontre de Monclin le signor :
Tel cop li donne le nostre ampereor
Que mort l’abat ans el pré a dolor,
Puis li a dit : « Orgueillox traïtor,
« Mout m’a[s] irié, toi et tui ancessor,
« De mon nevou qui mors est a dolor. »
Puis dist en haut, que l’oïrent entor :
« Ferez, baron, por Deu le criator !
« Hui sont antré Flamanc en pesme jor. »
Quant Girbers ait choisi l’ampereor,
Selon son duel li prist joie et baudor.
Quant l’ampereres de France le roion
Ot mort Guillaume de Monclin le baron,
Mout par fut grans le duel et la tenson.
Es vos Hymbert, le pere Ber[n]eison,[1]
Hanri del Liege abat mort el sablon.
Voit le son frere Guinemant le baron,
- ↑ 685 Es, ms. Et.
