Ja li eüst son paiement donné,
Quant Baucelins est par devant tornez,
Oncles Raoul qui tant ot poesté.
Huedonz le fiert, qui ne l’a point amé,
Jusques es denz l’a fandu et copé.
Voit le Raoulz, mout ot le cuer anflé.
Quant Baucelins fu a terre chaü,
Mout par en a Raoulz grant duel aü.
Vers Huedon point, ne l’a mesconneü ;
Parmi le hiaume le fiert del branc molu
Que jusqu’es danz a l’acier enbatu.
Del boen cheval l’a a terre abatu.
Es vos Girbert et Gerin le manbru,[1]
Et Mauvoisin qui mout ot de vertu,
Sor Flamans ont maint pesant cop feru.
Ja se fuissient au movoir esmeü,
Quant Berneysonz est a elz acorru ;
Raoul ancontre par cui adoubez fu,
El cors li a son espié enbatu.
Mort l’abati de l’auferrant crenu,
Pus s’escria, que bien fu entendu :
« Mort est Raoulz, qui tant outrageus fu,
« Qui arst ma mere et moi ot puis feru ! »
Grant duel en font si ami et si dru ;
Maintenant l’ont levé sor son escu,
Droit a Cambrai l’enportent irascu,
O lui Hermant et Baucelin son dru.
Li rois Girbers en a tel duel aü
Que par .j. pou que n’est del sens issu.
Grans fu l’estor et merveillox et fors.
Des Loherans fut grans li desconfors,
Por les trois princes qui sont ocis et mors,
Dont se ferirent el tornoi sans resors :
De celz de Flandres ont maint ocis et mors.
- ↑ 631 Es, ms. et.
