En cele eschiele huitiesme des marchis
Fut de Boloigne li quens Doonz li Gris.
.C. chevaliers sor les destriers de pris
Le vont sivant, chascun [s]on escu pris,
Des Loherans laidir volonteïs ;
Au chamin sont après les autres mis.
La nuefme eschiele conduist le conte Huedon,
Celui de Flandres qui fut de grant renon.
.M. chevaliers, qui moult ierent prodon,
Le vont sivant a coite d’esperon ;
Serré s’en vont, com nobile baron,
Vers Loherans qu’il n’ainment se pou non.
D’ame .ij. pars sont les oz deviséez
Et par eschieles gentemant ordonéez.
A l’asanbler oïssiez grans criées,
Et homes mors et seles enversées.
Hermant s’eslaisse par antre .ij. arrées,
Envers Droon d’Amiens lance levée,[1]
Et cil vers lui qui mainne grant posnée.
Ferir se vont, sor les targes roéez,
Que parmi outre les ont frete et fausséez.
De cel cop ot Hermant dure soldée
Que mort l’abat D[r]oonz anmi la prée.
Thyorins ot ceste joste esgardée,[2]
Qui de duel ait mainte lerme plorée.
Quant Thyorin ait veü trebuchier
Hermant son frere que il avait tant chier,
Sachiez de voir n’i ot que correcier.
Envers D[r]oon eslaisse le destrier :
Tel cop li donne de l’espée d’acier
[Que] mort l’a fait a terre trebuchier.
Pus li a dit .ij. moz en reprovier :
« Outre ! traïtres, Dex te doinst anconbrier ! »
A ice mot sont Flamant sans targier
Page:Anonyme - Raoul de Cambrai.djvu/425
Cette page a été validée par deux contributeurs.
314
raoul de cambrai
