Page:Anonyme - Raoul de Cambrai.djvu/418

307

d’après girbert de metz

Anmi le vis, que toz en fu senglant.
320« Dex, » dist Berniers, « biax pere roiaumant,
« Mauvès servise ai fait a mon vivant.
« Or me doint Dex, par son digne conmant,
« Tant de santé et que je vive tant
324« Que de cest cop vos ailliez repentant.

XIII« Sire R., » ce dist li prous Bernier,
« Mout duremant me doit ore annuier
ʄ. 309 a« Que vos avés ma mere arse el mostier
« Ou s’estoit mise por Damedeu proier,
« Et moi avés les dens faites seignier ;
330« De mon servise me randez mau loier.^[1]
« Por vos aloie mon pere guerroier
« Et mon lignage que devroie avoir chier.
« Vostre servisse me convient a laissier :
« A mes amis m’an retorrai arrier. »
335R. l’entent, n’i ot que correcier.
Del duel qu’il ot conmance a larmoier ;
Puis dist : « Amis, ne vos devés irier ;
« Correciez iere ; or si vos voil proier
« Que pardonnez me soit cist destorbier.
340« Je vos voldrai jurer et fiancier
« Que d’Oreignei referai le mostier. »
Dist Berneisons : « Tot ce n’i a mestier.^[2]
« Par celui Deu qui tot ait a jugier,
« N’en ferai rien tant que je voie arrier^[3]
345« Le sanc que vis jus de mon chief raier
« Tout soul par lui arieres repairier. »
Lors a brandi la hanste de pommier,
R. cuida parmi le cors percier,
Mais au devant se mist .j. chevalier ;
350Il fist que fox, mielz li venist laissier :
Berniers le fiert, que nel vout esparnier,
Parmi le cors li fist l’espié glacier,
Devant. R. le fist mort trabuchier,

1. 330 Cf. Raoul de Cambrai, vv. 1645, 1705, 1737.
2. 342 Ms. Ber.
3. 344-6 Cf. R. de C., vv. 1750-2.