Avec lui fut le filz Hymbert, Berniers,
Qui mout l’ama de cuer verai antier ;
Mais puis li fut la mort vandue chier.
Raolz fut fier, hardiz et combatant,
Perronne volt avoir d’estoremant,
Hans et Neele et Roie la devant,
Car l’ampereres li donna par son gant.
Cele part vint li quens R. preant ;
.C. chevaliers, hardiz et combatant,
Sont avoc lui qui tuit font son talant.
Le païs vont avant elz destruant.
Tant sont corru, et arriere et avant,
Qu’an Oreignei vindrent le feu boutant.
Une abaïe i ot riche et vaillant ;
Nonnains i ot, de lignage mout grant,
Qui Deu servoient de cuer et doucemant.
En l’abaïe vont li forrier courant,
Le feu i boutent et la vont embrasant.
Laianz avoit une dame avenant,
Mere Bernier, que Hymbert ama tant.[1]
Quant Berniers vit l’abaïe esprenant,
A R. vint por Deu merci criant :
Que il soffrist sa mere aüst garant
Que ne fust arse, que pechiez seroit grant.
R. respont, par mout fier mautalant,
Qu’il ne lairoit por lui .j. soul niant.
Dist Berniers : « Sire, vos faites voz talant,
« Mais mal anploi que vos vois bel servant,
« Et malvais sui, par Deu le roiamant,
« Quant devant moi voi ma mere morant,
« Bien an doi estre tenus a recreant ! »
R. l’oï, se li vait annuiant,
De sa main destre le feri maintenant
- ↑ 305 Ms. Ber. — Le trouvère a fait allusion plus haut(f. 303 d) à la naissance illégitime de Bernier dans les vers suivants : « Cil jovies hons fu Hymbert apelé, | D’une pucele ot .j. fil engendré | Qui puis fut plains de grant nobilité. | Cil anfes fut Berneison apelé, | Par lui fut puis tot le païs troublé.
