La veïst l’on maint riche garnement,
Contre l’acier faussent legieremant,[1]
Et maint vassal trabuchier mort senglant
Dont Dex ait l’arme par son digne commant
Grant fu l’estor et dure la mellée,
Quant Loheranc vindrent a l’asanblée.
Mout fieremant i a sa bone espée
Li berz Berniers duremant esprovée.
Voit le R., duremant li agrée,
Randre l’an cuide richement sa soldée.
Trestot le jor combatent a jornée
De cil au soir que la lune est levée,
Que cil des loges font as trez retornée.
Et li rois antre en la cite loée,
O lui Girbers et de lor gent privée ;
.C. en i laisse des siens goule baée,
Et Doonz fist d’autre part dessevrée.
Li rois descent soz l’olive ramée,
Puis est montez en la sale pavée ;
La ont entr’elz grant joie demenée.
Au roi se clainme R. de sa contrée :
« Niés, » dist li rois, « par ma barbe mellée,
« Ja n’i perdrois une pomme parrée :
« Perronne et Roie i avez conquestée,
« Neele et Hans vos en iert aquitée :
« Je la vos doing ; ja n’en perdroiz danrée
« Tant conme puisse çaindre au costé espée. »
R. l’entent, si l’en fist anclinée.
Ce fut folor et male destinée,
Quar, ains que fust la quinzaine passée,
An ot R. l’arme del cors sevrée :
Berniers l’ocist, c’est veritez provée,
Soz Orreignei, an mileu de la prée.
En Cambrai fut l’amperere au vis fier,
Li rois Girbers et Gerins le guerrier
- ↑ 215 faussent, corr. fausser ?