« Qui Cambrai ait de vos a justicier.
« Li quens Hued. et Doon le guerrier
« Et Rancelins et le lignage fier
« L’ont a Cambrai fait a force asegier. »
Li rois l’entent, si s’en prist a irier ;
Del mengier saut, si commance a huchier :
« Or tost as armes, tuit cil qui m’avront chier !
« Que, par celui qui tot ait a jugier,
« Se les traïtres puis a mes poins baillier,
« Tot l’or de mont ne lor ara mestier
« Que ne les face ocire et detranchier. »
Quant li baron ont entendu le roi,
En piez saillirent chascun en droit de soi ;
As hostelz vont aprester lor conroi.
Messagier courent, ça .j., ça .ij., ça troi.
Au duc Sanson s’an torna Godefroi,
A Gironvile Theriet de l’Ausnoi,
Et a Saint Gille Guillaume de Cabloi,
Et a Gerart vait Guiot Malefoi,
Droit a Coloigne Anthiaume de Gavroi,
Au roi Gerin qui mainne grant nobloi.
Chascuns de ceus si semont endroit soi
Lor chevalier[s], qu’il vienent a Cambroi.
A Paris vindrent trestuit a grant effroi.
A Paris sont tuit li ost aüné,
Mais l’amperere n’i ont (il) mie trové :
Lui et li sien s’en estoient torné,
Et Ysengrins est avec lui alé
Et si dui fil qui mout erent sené.
An lor compaigne furent .x.m. armé.
Jusc’a Cambrai ne se sont aresté ;
Voient le siege, environ et en lé,
Qui estoit tot environ la cité,
Et ceus dedens orent a elz josté.
Mout s’i fu bien Berneison[s] esprové ;
Maint ruste cop i ot le jor donné,
Maint chevalier et ocis et navré,
Et maint destrier perdu et conquesté,
Page:Anonyme - Raoul de Cambrai.djvu/413
Cette page a été validée par deux contributeurs.
302
raoul de cambrai