Quant voit Gr. Gaut. est mors getés,
C’il fu dolens, ne l’estuet demander.
Les portes fait et tenir et serrer,[1]
Puis si s’en est droit a[s] creniax montés
Et a gardet tot contreval le pret ;
Voit Juliien, cel prent a apeller :
« Biax niers » dist il, « mercit por l’amor Dé !
« Aies mercit de ce[l] las parjuret.
« J’ocis ton pere, se est la verité,[2]
« En traïson ne puet estre celet :
« Or te requier, por Dieu de majesté,[3]
« Qu’aies de moi et mercit et pité. »[4]
Juliiens l’oit, si c’est haus escriés :
« Par Dieu, viellart, por noiant en parlés :
« Jamais vers moi ne serés acordés. »
Ces barons a hautement escriés :
« Or tost, baron, por Dieu, si asallés ! »
Et il si firent de bone volenté.
Adont i ont mainte pierre jeté,
Mais ne lor vaut .j. denier moneet,
Car n’i forfirent vaillant .j. oef pelet ;
Maint en i ot el fosset cravanté.
