Hauce le branc, cel fiert par tel aïr
Dusque es dans li fait l’acier sentir ;
Estort son cop, si le convint morir.
L’arme s’en torne : Diex l’ait en paradis !
Gautiers ot mort Savari le vaillant,
Il s’an torna ; s’escrie hautement :
« Ou sont alés li .ij. B. enfant ?
« Je lor ai mort .j. lor prochain parent,
« Et d’iax meïsme ferai je autretant. »
Juliiens l’oit, celle part vint poignant ;
Puis li a dit : « Vassal, se Diex m’ament,[1]
« Se l’avés mort il m’en poise forment.
— Or le vaingiés, » dist Gautiers erranment,
« Tant con je sui devant vous en presant.
— Si ferai je, se Diex le me consent. »
Lors s’entre[s]laissent et vienent fierement.
Grans cops se donent sor les escus devant ;
Desos les bocles les vont tos porfendant.
Fors haubers orent, que maille n’en desment.
Lors lances brisent, li trous volent au vant.
Juliien trait le branc d’acier trainchant
Et fiert Gautier sor son elme luisant :
L’elme li trainche et la coiffe ancement ;
Dusqu’a l’arçon li fait coler le branc ;
Le cheval trainche san point d’arestement.
Dusqu’a la terre a fait coler le branc.
« Sain Quentin ! » crie, « baron, ferés avant ! »
Vo[it] le Gr., molt ot le cuer dolent :
Il prist .j. cor, sel sona durement,
Son retrait sonne, si s’an torne fuiant ;
En la cité s’en est tornés atant.
- ↑ 8665 ament, ms. anent.
