Après les hanstes traient les brans d’acier.
Estes les vous tornés au chasploier.
Grans fu la noise, la bataille est fornie ;
D’anbe.ij. pars fierent par aatie,
Li sor Gr. tint l’espée forbie ;
Maint hiaume a frait, mainte teste percie.[1]
Cui il ataint molt est corte sa vie.[2]
Et Gautelès ces grans cops i anplie,
Et Juliiens de l’autre part gramie
Et Henriès a la chiere hardie.
Les gens Gr. sont tornés a sotie.
Gr. le voit, tous li sens li fremie :
Contre iax fera, c’il puet, .j. anvaïe.[3]
Quant Gr. voit Juliien et Henri
Desor ces hiaumes si durement ferir,
Tel duel en ot le sanc cuide marrir.[4]
C’il voit son leu ces vaura envaïr.
La ou il torne fait tos les rens fremir.
Gaut. ses niers i fiert par grant aïr.[5]
En la grant presse encontra Savari ;
Fiert le sor l’iaume, le cercle a fait partir.
Fors fu la maille del blanc hauberc tresli,
Mais que del cop l’a il si estordit
Qu’a ces ij. mains le convient a tenir.[6]
Gaut. li cort, par l’iaume l’a saisit,
Par droite forse li a ostet anqui ;