« Jel vous dirai, » B. li respondi.
« Ce poise moi quant il vous plait ainsis.
« Il me remenbre de Raoul le marchis[1]
« Qui desor lui avoit te[l] orguel pris,
« Qu’a .iiij. contes vaut lor terre tollir.[2]
« Vees ci le leu tot droit ou je l’ocis. »
Gr. l’entent, par poi n’anraige vis,
Mais a sa chiere point de sanblant n’an fit,
Et neporquant a B. respondi :
« Par Dieu, vassal, n’estes pas bien apris,
« Qui me remenbres la mort de mes amis ! »
Adont ancontrent païsans del paï[s] :
De la contesse lor ont novelle dit,[3]
Et si lor dient n’est pas a Sain Quentin,
Ains est a Ancre, .v. jors a aconplis.
« Singnor baron, » dient li païsant,
« Icelle dame qui tant a le cors gent,
« Fille est Gr., fenme B. le franc.
« Elle est a Ancre, o li si dui anfant. »[4]
Li baron l’oient, si s’an tornent atant.
A Sain Quentin sont a prime sonnant ;
.I. poi mangierent, puis monterent atant.
Tout droit vers Ancre se vont il chevauchant[5]
Li sor Gr. sospire molt souvant ;
De la parole ot molt le cuer dolent,
A bien petit que li cuers ne li fant.
Guerri ot duel, ce saichiés vous de fi,
