Et de ce fist B. cortoisie
Que descendi del destrier d’Orquennie,[1]
Sa feme acole, si l’a .iij. fois baissie,
Et elle lui, car molt fu esjoïe.
« Sire, » dist elle, « Jhesus li fix Marie,
« Soit de vos garde et ait en sa baillie. »
Il li respont : « Et Diex vous beneïe ! »
Son fil enbrace qui molt ot de bonté.
Baisiet li a et la bouche et le nés.
« Biax fix, » dist elle, « bien soiés vous trovés ;
« Bien soit dou pere qui vous a engenret. »
Henriès a B. apellet :
« Sire, » dist il, « mon frere me monstrés. »
Et dist B. : « Vees le la, en non Dé !
« Que vostre mere en a ces bras coubré. »
Quant il le voit, si est a lui alés.
Il s’antracolent par molt grant amisté.[2]
Voit le la dame, s’a de pitié ploré :
« Anfant, » dist elle, « molt vous devés amer,
« Et vostre pere servir et honorer ;
« Le roi de France a vo pooir garder,
« Car contre cel ne puet nus hons aler,[3]
« Et c’il i va a mal li doit torner,[4]
« Et la corone assaucier et lever.
« S’ ainsis le faites con vous m’oés conter,
« Sos ciel n’a home qui vous puisse grever. »
A icel mot monta B. li ber,
Et fist la dame et ces .ij. fis monter.
A Sain Quentin vinrent sens demorer.
Au grant mostier s’an est B. alés,