Et il si firent quant il l’ot conmandet,
Et B. est lui quart si demorés,
Lui et son fil et Savarit le ber [1]
Et le viellart qu’il ot desprisonnet.[2]
Parmi la porte sont en la ville entrés ;
Chiés le borjois sont venus a l’osté
Ou il avoient autrefois sejornet. [3]
Celui soir ont a grant joie passet.
Celui soir sont richement herbigiés.
Li jantix hostes les a molt aa[isiés],
Et au matin alerent au mostier
Le viellart home lever et baptisier ;
Au baptisier l’apellent Aingelier.
.I. jantix hons qu’ot Sain Gile a baillier
Il an apelle Juliien et B. :[4]
« Dont estes vous, por Dieu le droiturier ? »
Et il respondent : « De Sain Quentin le sié. »
Et il respont : « Dont vous ai je plus chier.
« Tot por l’amor d’un vaillant chevallier,
« Il a .xv. ans aconplis et antiers,[5]
« Qu’an ces païs vint saint Gile prier,
« Et avuec lui sa cortoise mollier
« Grosse et ensainte, fu preste d’acouchier.
« Chiés .j. borjois se furent herbigiés.
« La ot enfant ; g’i fui au baptisier ;
« Mon non li fis et mestre et ostroier.
« Puis vint au pere .j. mortel enconbrier.
« Paiens me vinrent mon païs escillier,
« Jusqu’a mes portes paleter et lancier.
« Il s’an issi armés sor son destrier
