« Se je truis home qui de mere soit nés,
« Se nel vous rens mort et enprisoné,[1]
« Faus soiés vous se vous ne m’afolés. »
Dist l’amassor : « Biax amis, bien ferés ;
« A Mahomet soiés vous conmendés,
« Que il vous puisse et garir et sauver. »
En Juliien ot molt bon chevallier,
En païnime n’an avoit .j. plus fier ;
Et prist .xx.M. de tos le[s] miex prisiés,
Vers la cité prennent a chevauchier.
Quant B. les an vit aprochier,
Le roi Corsuble en prist a araisnier :
« Faites vos gens entor les murs raingier ;
« Avuec moi vaingnent cil bacheler ligier
« A cui il vuellent les terres chaslaingier.
« Ains qu’il se puissent devant les murs logier,
« Ceste venue conparront il molt chier. »
Et dist Corsubles : « Molt vous en vuel proier. »
Lors fait sa gent et serrer et raingier.
Fors s’en issirent dusqu’a .xxx. millier ;
B. les guie et Savaris li fiers.
Juliiens vint poignant sor .j. destrier,
Et fu armés d’auberc et d’yaume chier,[2]
De bone espée et de hiaume d’acier,
Et porte droite la hanste de pomier ;
Sa covreture fu d’un paile molt chier ;
A grant mervelle porsailloit son destrier ;
Bien resanbloit le sien pere B.
B. le voit, prist soi a mervillier ;
Dedens son cuer le conmence a prisier.
