Courtoisement fu par lui aparlez :
« Sire B., frans chevaliers menbrez,
« Vivreiz en vos ? gardez nel me celez.
— Oïl voir, sire, mais molt sui agreveiz.
— Dex ! » dist li rois, « t’en soies aourez !
« Tant quidai vivre, ja mar le mesqerrez,
« Qe vos fuissiés a Gautier acordez ;
« Mais tant par est fiers et desmesurez
« Qe nel feroit por l’or de .x. citez. »
Dist B. : « Sire, ja autre n’en verrez.[1]
« Gautiers est jovenes, de novel adoubez,
« Si quide bien faire ces volentez.
« Mais, par celui qi en crois fu penez,
« Se n’iert jamais a trestoz mes aez
« Qe je ja soie recreans ne matez. »
Gautiers l’oï qi molt fu aïrez :
« Cuivers bastars, com iés desmesurez !
« Mon oncle as mort qi fu preus et senez,
« Ton droit signor, con traïtres provez.
« Ce est mervelle comment vos le soufrez.
« De vostre orelle estes mal atornez
« Qi desor Sainne remeist gisant es prez. »
Dist B. : « Molt grant tort en avez.
« Tel vos donnai, si qe bien le savez,
« El flanc senestre fustes parfont navrez.
« Ce poise moi, dolans en fui aseiz.
« Grant pechié faites qant ne vos acordez. »
Gautelès l’oit, ne len est pris pitié.[2]
« Sire Gautiers, » dist B. li gentiz,
« Por amor Dieu qi en la crois fu mis,
« Iceste guere dur[r]a ele toudis ?
