« Baron, » dist il, « envers moi entendez :
« Par toz les sains qe vos ici veez,
« Et par les autres dont Diex est aourez,
« Qe B. est ici parjurez.
« Ancui en ert recreans et matez. »
Et dist B. : « Se Dieu plaist, vos mentez. »[1]
Et Gautiers est sor son destrier montez,
B. el sien qi fu la amenez.
Gautiers fu jovenes, de novel adoubez,
B. a requis comme senés.
Sor son escu li fu tex cols donnez,
Desoz la boucle li est frais et troez
Et li haubers rompus et despanés,[2]
Parmi les costes li est li fers passés.
Si fort le hurte Gautelès l’alosez
Plaine sa lance l’abat enmi le pré ;
Et Gautelès s’en est outre passez,
A vois c’escrie : « Bastars, n’i garirez.
— Voir ! » dist B., « plus terre ne tenrez.
« Hom abatus n’est mie toz matez. »
Berneçons ot le cuer grain et irié,
Qant il se vit jus del cheval a pié.
Il traist l’espée, s’a l’escu embracié ;
Au cheval vint q’il vit aparillié.
B. monta par le doré estrié ;
Dedens le fuere a le branc estoié.
Le destrier broiche, si a brandi l’espié,
Et fiert Gautier sor l’escu de quartier ;
Desoz la boucle li a frait et percié,
Et le hauberc rompu et desmaillié.
