Il vest l’auberc, lace l’elme burni,
A son costé a çaint le branc forbi.
Atant eis vos son seneschal Tieri
Qi li amaine son destrier arabi ;[1]
W. i monte, s’a son escu saisi,
Et prent la lance au confanon sarci.
Isnelement fors del palais issi.
Va s’en quens W., ç’avala les degrez ;
Desq’a la bare n’ot ces resnes tirez,[2]
Voit la grant route des chevalier[s] armez,
Il a parlé : « Frere Y., dont venez ?
« Est ce besoing, qi a ceste eure alez ?
— Oïl voir, frere, ja si grant ne verez.
« Rois Loeys nos vieut deseriter :
« R. le conte a nos païs donnez ;[3]
« A .x. mile homes est en no terre entrez.
« Grans mestiers est qe bien la desfendez :
« Isnelement toz nos amis mandez. »
Et dist quens W. : « Nos en arons assez ;
« Mais encor cuit adez qe me gabez ;
« Je nel creroie, por l’or d’une citez,
« Li quens R. fust ci desmesurez
« Qe ja sor nos soit ci a ost tornez.
« Li sors G. est saiges hon asez ;
« Ains tex consoux ne fu par lui trovez. »
Respont Y. : « De folie parlez :
« Toz Origni est ars et embrasez,
« Et les nonnains qe mises i avez
« A toutes arces, ce fu grans cruautez. »
