Mais ne crient arme ne fort espieu tranchant.
Et prent l’espieu a or resplendissant,
A .v. clox d’or l’ensaigne bauliant.
Fait .j. eslais a loi d’ome saichant :[1]
Au reteoir le va si destraignant,[2]
C’onques de terre le sorportast plain gant.[3]
Dient Francois : « Ci a molt bel enfant ! »
« L’onnor son pere ira bien chalengant. »
Tex en fist goie qi puis en fu dolant,[4]
Com vos orrez, ce longuement vos chant.
Adoubés fu R. de Cambrezis.
Une grant piesce remeist la chose ensi.
Nostre empereres au coraige hardi
Le retint bien comme son bon ami,
Et seneschal, ce savons nos de fi,
En fist en France, si com aveiz oï.
Or n’a baron de ci qe en Ponti
Ne li envoit son fil ou son nourri,
Ou son neveu ou son germain cousin.
Il fu preudon : ces ama et goï,
Bien les retint et bien les revesti ;
Si lor donna maint destrier arabi.
Dolant en furent trestuit si anemi,
Et li Manciax qi le don recuelli
De Cambrizis, qi a mal reverti.
R. fu preus, de son quer le haï :
Par le concel au riche sor G.
Commença puis tel noise et tel hustin
Dont maint baron furent mort et traï.