« Toute la terre li doin en mariaige.
« Vaigne a ma court sans nesun arestaige
« Et si ameint o soi tot son barnaige,
« S’i manderai le plus de mon lignaige ;
« Et s’ele i faut, trestot par son outraige,
« [* S’irai saisir la terre et l’eritaige ;] [1]
« [* De son doaire porra] faire mesnaige, [2]
« [* Que ja en l’autre] ne prendra plait ne gaige. » [3]
Li mès s’en vait qi congié demanda ;
Dessus la cele sor son destrier monta,
De Paris ist, droit a Cambrai s’en va ;
Par la grant porte en la cité entra.
Au grant mostier de saint Geri torna ;
La gentil dame en la place trova ;
Maint chevalier en sa compaignie a.
Li mès descent, son cheval aresna ;
De par le roi la dame salua :
« Cil Damerdiex qi le mont estora
« Et ciel et terre et trestout commanda
« Saut la contesce et ciax que amés a
« De part le roi qi a garder nos a !
— Diex gart toi, frere, qui le mont estora !
« Di, qe me mande li rois ? nel celer ja.
— En non Dieu, dame, mes cors le vos dira :
« Li rois vos mande, qi grant poesté a,
« Qe a baron Giboin vos donra ;
« Saichiez de fi, li rois le commanda. »
- ↑ 152 Omis dans A. Avant de citer ce vers, Fauchet écrit : « Il (l’auteur) fait Raoul de Cambrai nepveu du roy Loeïs, lequel, après la mort (de Taillefer) mande a Alis espouser Giboin le Mansel, qu’il fet conte de Cambrai, jusques a ce que Raoul soit en aage ; que, si elle ne le veut prendre en mariage, il lui mande : s’irai saisir… »
- ↑ 153 A mesage, B menasge.
- ↑ 154 B Que ja en l’autre n’avra denier ne gage.
