Page:Anonyme - Macaire, chanson de geste.djvu/485

3469—3490

293

Macaire.

« Ferés l’acorde par bone entencion
« De la roïne à la clere façon. »
Dist l’emperere : « Et nos si l’otrions. »
Atant dus Naimes et Ogiers, li baron,
D’illec se partent sans noise et sans tençon,
Desci à l’ost l’emperéor s’en vont.
Là où le voient si l’ont mis à raison.
« Sire emperere, ce dist li dus Naimon,
« Salus vos porte de part le roi Kallon,
« Parler vos vuet par bone entencion,
« Se vos mesfist, por faire amendison.
« Sa dame rait, que drois est et raisons. »
Et cil li dist : « Et nos si l’otrions ;
« Dès que vos plaist, ne sera se bien non. »
Adonc dus Naimes envoie por Kallon,
Que à lui viegne por faire acordison,
Avec le roi d’outremer le roion.
Quant la novele est venue à Kallon
Il jure Dieu, saint Pol et saint Simon,
Que mais ne fu ni nen ert en cest mont
Qui de savoir de sens et de raison
Acomparer se puist au duc Naimon.