Page:Anonyme - Macaire, chanson de geste.djvu/473

3327—3353

281

Macaire.

« Où il me fist à tel vieuté mener,
« Et por m’ardoir vi le feu alumer
« Où me voloit tote vive ruer.
« Se j’oi paor, ne fait à demander.
« Quant li bons abes me vint à confesser,
« De cele peine me fist il respitier.
« Atant mes sire me fist fors enmener
« A Auberi, qui ert cortois et ber.
« Dou traïtor qui li sorvint derrier
« Por me honir et mon cors vergoigner,
« Le vi, por moi defendre, mort jeter.
« Et quant ce vi, si m’alai afichier
« Ens el grant bois por ma vie sauver.
« Asés m’ala cerchant cil pautoniers ;
« Ne me trova, si s’en torna arier.
« Nen véez vos icestui Varocher ?
« A grant merveille le devés vos proisier,
« Sor tote rien amer et tenir chier.
« Por moi laissa ses fils et sa moillier,
« Ne mais de moi ne se vout desevrer.
« Primes sanloit truant à l’esgarder ;
« Mais plus ne vuelt de cel mestier ovrer,
« Puis que mes peres l’adoba chevalier.
« D’ore en avant moult fait il à proisier. »
Dist li Danois : « El mont nen a son per ;
« Por bien ferir et por grans cops doner
« Mieudre de lui ne se puet mais trover. »