Page:Anonyme - Macaire, chanson de geste.djvu/440

248

2938—2964

Macaire.

« Oit una spea qe trença volunter :
« Curtana l’apelent Alemant et Baiver.
« Plu trença fer, rubi o açer
« Qe nula falçe la erba del verçer. »
Dist la raine : « E l’o ben en penser. »
Dist Varocher : « Pensés de l’esploiter,
« Qe primamant voio à li canpo entrer. »
Dist Bernardo, le sir de Mondiser :
« Sire Varocher, vu avés bon penser,
« Non aça l’ovre si forte ad aster,
« Qe tel se cuita vendere e cançer
« Qe à la fin si le compra molto çer.
« Mal conosés li Danois Oger ;
« En tot le mondo e davant e darer,
« En paganie e por li batister,
« Ne se trovaria un milor çivaler. »
Dist Varocher : « Ben l’o oldu nomer,
« Ma no por tant e nol doto un diner,
« E d’una ren vos voio creenter :
« Pois qe mon sir me dono li corer,
« Eo devente si argolos e fer,
« Quando de le bois me ven à remenbrer
« Qe sor li doso portava tel somer
« Como faroit un corant destrer,
« De retorner plus à quel mester,
« Sacés par voir, se Deo vole aider,
« De retorner al bois e non faço penser.