« Jugier me vout à tort, vilainement,
« Si m’envoia chetive et pourement
« Par autrui terre ma vie aler querant (*)
« Tote solette, avec un de sa gent ;
« Mais neporquant sui et grains et dolens
« Quant ont si home aucun encombrement.
« Ce fait mes peres ne nus autres vivans
« Por soi vengier de l’oevre aparissant
« Que de moi fist à tort, vilainement. »
Et Varochers s’en retorne à itant,
La dame lait et Berart ensement,
A la bataille s’en vait apertement.
Grans fu l’estors et fors et adurés ;
L’uns rois à l’autre mostre sa poesté,
Dont li dus Naimes en fu grains et iriés,
Et, por Berart qu’ert pris, tos abosmés.
Et Kallemaines tant fu avant alés
Qu’o l’autre roi se sont entrencontré. (*)
O Kallon furent Naimes et Isorés, (*)
Morans li preus et li quens Salatrés ;
Chascuns en main tient le bon branc letré.
La gent averse menent à grant fierté.
