« Çuçer me volse à torto, vilanemant,
« Si m’envoio çativa e poveramant
« Por altru tere alere mendigant
« Tota solete, cun un de soa çant ;
« Ma noportant e son grama e dolant
« Quando sa jent a nul ennoiamant.
« Mon pere le fait ne no altro hom vivant
« Par soi vençer de l’ovre aparisant
« Q’elo de moi en fe vilanemant. »
E Varocher si s’en retorna atant,
Lasa la dame e Bernard ensemant,
A la bataile s’en vait apertemant.
Grande fu la bataile forte et aduré ;
L’un emperer cun l’autre mostre sa poesté,
Donde dux N. en fo gramo et iré,
Por Bernardo, qe fo pris, en fo tot abosmé.
E K. Maine tant fu avant alé
Qe cun l’autre enperer el se fo encontré.
Cun K. estoit N. et Salatré,
Morando li pros e li cont Salatré ;
Çascun tenoit in man li bon brando litré.
Sor qui de Costantinople menoit gran ferté.
