Page:Anonyme - Macaire, chanson de geste.djvu/396

204

2404—2427

Macaire.

E de bataile estoit molto ençegnos.
Quant il oit mort cil çivaler de Blos,
Elo dist à sa gent : « Segnur, qe faites vos ?
« Car or me vençés la bela Blanciflors,
« Qe K. el maine n’oit fato tel desenors. »
E cil le font quant oent li contors.
Doncha oisés di colpi gran sons.
E qui de Françe le ferent ad estros ;
Doncha verisés un stormeno dolors ;
Mant çivaler furent del çevo blos.
Mal vide K. li culverti traitors
En cui senpre a metu son amors,
Ço fo qui de Magance e de ses parentors,
Que senpre fe à K. onta e desenors.
Mes Damenedé, li pere glorios,
Le fi asa avoir onta e desenors,
E à mala mort çuçés li ses milors
Le primer fu dan Gaines li contors
Qe traï in Spagne li doçe compagnos,
Rolant e Oliver, Belençer e Ontos,
E li vinte mille qe oncis Marsilions.
Mais por Machario vene tel tençons
Qe cristian cun cristian avoit tel pardons
Qe non fu estoré por nesun hon del mons.