« Bien sai vos sire est de grant hardement,
« Si sui dolens quant li vai contrestant,
« Mais ceste fois n’en ira autrement. »
Dist li mesages : « A Damedé vos rent. »
Congié demandent, si se vont aroutant ;
Prise ont lor voie, n’i font arrestement.
Tant sont alé par puis et par pendans,
Asés durerent et peines et tormens,
En lor cit vienent, illec vont descendant.
Trovent le roi ad un suen parlement
Où il avoit de barons plus de cent,
Dont ert chascuns et saiges et vaillans.
Li mesagier pas ne furent vilain ;
Tant ont cerché et les mons et les plains
Qu’en lor cité venu sont à un main.
L’emperéor trovent illec devant.
De soe fille moult ert liés et joians,
Que l’ot o lui en santé et vivant.
Se le séust Kalles, li rois poissans,
Ja à nul jor ne fust mais si joians,
Que il l’amoit sor tote rien vivant.
Dist li mesages : « Gentis rois soverains,
