« Ne te laira, si diras verité. »
Adonques a Macaires comencé
Si a gehi trestot le suen pechié
Com ovré ot et avant et arier.
Adonc Macaires comença erranment
De la roïne où fist le parlement
Tot primerains el jardin verdoiant,
Si com d’amor l’en aloit requerant
Et com à lui respondi laidement. (*)
Si dist del nain trestot le covenant :
Com li manda parler premierement,
Et en après si a dit ensement
Et de la chambre, et com par son comant
Dedens le lit entra par mautalent
A la roïne por faire nuisement ; (*)
Et com el feu le jeta voirement
Por que de l’oevre séu ne fust noient.
Et quant aler vit la roïne avant,
Que l’en menoit Aubris, plus fus dolens
Qu’ele ne fust bruïe el feu ardent.
Et quant ce vit, il prist son garnement,
Si l’enchauça, armés sor l’auferrant, (*)
