A une vois tuit ont levé le hu,(*)
Braient et crient : « Sainte Marie, aiu !(*)
« Ancui en soi li voirs apercéus ;
« Por Auberi mostrés vostre vertu ! »
Grans fu l’estors, n’en fu mais tés véus(*)
Si come l’orent celui jor maintenu.
Quant li parent Macaire l’ont véu,
Dient ensemble : « Com sommes decéu !
« Déussions estre par un chien confondu ? »
Sor plaissié uns des lor saillis fu ; (*)
Ens fust alés, quant escrié li fu
Que maintenant soit il pris et pendus
En celui lieu où il s’ert embatu. (*)
Et cil s’en fuit, quant il l’ot entendu.(*)
Vait s’en li glous, ne se vout atargier.
Atant li rois a fait un ban crier
Chascun de cels qui le porra cobrer,
Il li fera mile livres doner.
Quant uns vilains oï le banoier
Qui de la vile venoit à comperer,
A la cité por soliers achater ;
En sa main ot un baston de pomier ;
Il l’en arreste au passer d’un placer, (*)
