Tot fist par decrez et par lois
Vers sa gent ce que fere dut.
Onques home ne mesconnut
Por poverte ne por richece.
Bien afferoit a sa hautece
Ce qu’il ert sages et cortois.
De deduit d’oiseax et de bois
Ne savoit nus hom avant lui.
Il valoit de tels rois .j. mui
Com il a puis el regne eü.
Par effors de lance et d’escu
Conqueroit toz ses anemis :
Ja arbalestiers n’i fust mis
Por sa guerre en auctorité ;
Par averté, par mauvesté[1]
Les tienent ore li haut home;
Por demi le tresor de Rome
Ne vousist il, a droit n’a tort,
Q’uns en eüst prodome mort
En son ost, nés son anemi.
Et si portoit l’escu demi
Au gentil conte de Clermont,
Au lion rampant contremont
D’or et d’azur, et d’autre part.
Plus estoit hardiz d’un liepart
Quant il ert armez, l’escu pris.
Et savez dont ge mout le pris ?
Sa justice et s’envoiseure
Par ert de si grant tempreûre
Q’en n’i trovast ja point d’outrage.;
Sa hautece et son vasselage
Bessoit mout selonc sa franchise
S’estoit a toute gentelise
Apers et dous et ademis.
- ↑ 62 Ms. mauvestié.