Ce sachiez de fi et de voir,
Bien a cist les autres passez;
Ja nuls n’iert de l’oïr lassez,
Car, s’en vieult, l’en i chante et lit,
Et s’est fez par si grant delit
Que tuit cil s’en esjoïront
Qui chanter et lire l’orront,
Qu’il lor sera nouviaus toz jors.
Il conte d’armes et d’amors
Et chante d’ambedeus ensamble.
S’est avis a chascun et samble
Que cil qui a fet le[1] romans
Qu’il trovast toz les moz des chans,
Si afierent a ceuls del conte.
Si commence ici son conte.
En l’empire ou li Alemant
Ont esté maint jor et maint an,
Si com li contes dit, segnor,
Ot jadis un empereor :
Corras ot non de par son pere,
Qui devant lui fu emperere.
Mout le tindrent les genz a preu ;
Ne vos avroie hui conté preu
Quels hons il fu, car ne porroie
Onqes au grant siege de Troie,
N’ot home si bien entechié ;
Si haï mout vilain pechié
Et en esté mengier a fu.
Dès cele hore que il nez fu,
N’oï nuls issir de sa bouche
Grant serement ne lait reproche.
Mout se contint com sages rois :
- ↑ le, ms. les.
