.XXX. ans la seignourie !
« Jamès n’auré joaye en toute ma vie ! »
Payens s’elleissent, que Jhesu mal aye !
Premier encontrent la gent de Rommanie,
Entre eulx se fierent comme gent effraye.
Garnier abattent le duc de Quoquenie
Niés l’Apostaire qui Romme a en baillie.
C’est grant dommage ! perdu y a la vie.
Quant le roy Aiquin ot fait celle envaïe,
Isnellement a la famme aqueillie,
[Ou] chastel entre luy et sa compaignie.
Quant le vait Charles, n’a talent qu’il se rie ;
Garnier regrete : « [Garnier,] o la chiere lie
« Vostre arme soit de Jhesu requeillie ! »
Charlez en jure le filz sainte Marie,
Que maintenant e[r]t la ville asaillie.
Moult fierement ont la ville asaillie ;
O feu gredays l’ont arse et brusl[i]e.
Aiquin s’en tourne qui ne peut fouyr mye.
LA ville arse, fouyant s’en va Aiquin, (fo 56 vo)
Vers la marine s’en va tout le chemin.
Ung hermitage trouva le Barbarin ;
L’ermite est apelé Corentin,
Messe chantant dou baron saint Martin.